Hilerokoa lantzen dugun eragileon katalogoa
2024-11-19
Hilerokoa lantzen dugun eragileon katalogoa
Ara!Gorputzen 2018tik dihardugu Hilerokoaren Kultura eraikitzen. Hasieratik genekien mundu ikuskera ziklikoa mugimendu askoren arteko nahasketatik sortzen ari zela. Beraz, intuizioz bazen ere, gure lurraldean hilerokoaren gaia lantzen ari ginen bakarrak ez ginela bagenekien.
Gainera, sareak maite ditugu! Isolaturik nahi gaituen kapitalismoaren aurrean, gure hautua beti saretuak egotea da: Larrutik interkooperazio feminista sarean gaude, BDSKoop-en parte gara baita Olatukoop-en ere. Horregatik, zera galdetu genion geure buruari: identifikatuko ditugu hilerokoaren zikloa euskaraz jorratzen duten kideak? Proposatuko diegu elkar ezagutzea?
Ilusio horretaz gain, Euskal Herriko hainbat txokotik hilerokoaren inguruko saioak emateko eskaerak iristen zaizkigu eta zenbait kasutan, penaz, ezetz erantzun behar izaten diegu. Batzuetan, dugun lan kargarengatik. Besteetan, Bidasoatik oso urruti daudelako eskatzaileak.
Behar eta desio horiek asetzeko prozesu bat abiatu genuen 2023an, Gipuzkoako Foru Aldundiaren finantzazioarekin. Ibilbidearen lehen urratsa Euskal Herrian hilerokoa euskaraz lantzen dugun eragileon katalogoa1 osatzea izan zen. Sorginlore2 elkarteko kideekin elkarlanean 14 eragile identifikatzera iritsi ginen. Zelako poza hartu genuen gure senak iradokitzen ziguna erreala zela jakin genuenean! ;)
Hurrengo urratsa, bideo dei bitartez elkartzea izan zen. Horrela, elkar-ezagutu ahal izan genuen, gure ekimenen indargune eta erronkak partekatu genituen, eta katalogoaz mintzatzeko tartea ere hartu genuen. Ederra izan zen elkarri aurpegia eta ahotsa jartzea!
Aurrera begira gaude eta katalogoa bizirik mantendu nahi dugu. Beraz, hilerokoaren zikloan aditua ala aritua bazara eta katalogoan parte hartu nahi baduzu, idatzi info@aragorputz.eus -era. Eman beharreko urratsak atseginez adieraziko dizkizugu :)
Ara!Gorputz
1Katalogoa txukun-txukun maketatuta esteka honetan dago: www.aragorputz.eus/eskoletan
2https://www.sorginlore.eus/
ELKARBANATU:
Iruzkinak idazteko saioa hasi behar duzu